Si à choses inegales, on oste choses egales, les restes sont inegaux.

A ceste notion Clavius adjouste aussi, que si de choses inegales on oste choses inegales, c'est à sçavoir de la plus grande, moins, et de la plus petite, plus ; les restes sont inegaux, sçavoir est celuy-là plus grand, et cestuy-cy plus petit.

Or en toutes les quatre notions precedentes par le mot de choses ou quantitez egales, il faut aussi entendre une mesme commune à plusieurs ; Car si à choses égales on y en adjouste une mesme commune, les touts seront égaux. Et si de choses égales on en retranche une commune, les restes seront aussi égaux. Et si a choses inegales on en adjouste une commune ; où à une mesme chose commune, on adjouste choses inegales, les tous seront inegaux. Et si de choses inegales, on en retranche une mesme commune, ou d'une mesme chose, on en retranche d'inegales, les restes seront inegaux.