Cercle, est une figure plane, contenue par une seule ligne qu'on appelle circonference, vers laquelle toutes les lignes droictes menees d'un seul poinct de ceux qui sont en icelle figure, sont égales entr'elles.
Et ce poinct-là est appellé centre du cercle.

De toutes les figures planes, la plus parfaicte est le cercle, lequel, selon que le definit icy Euclide, est une figure plane contenue et environnee d'une seule ligne, à laquelle toutes celles menees d'un seul poinct de ceux qui sont dedans la figure, sont égales entr'elles : et cette ligne là s'appelle periphere, ou circonference du cercle ; et le susdict poinct, centre du cercle : Comme par exemple, si une superficie ou espace est environnee d'une seule ligne ACE, et que de quelque poinct d'audedans d'icelle, comme de F, toutes les lignes droictes menees au terme ou circuit ACE, comme FA, FC, et FE, sont égales entr'elles : telle figure plane sera appellee cercle, et le terme ou ligne ACE, qui circuit et environne icelle figure, s'appelle periphere, ou circonference du cercle : mais ledit poinct F, est nommé centre du cercle.

Quelques Geometres definissent autrement le cercle, et disent, que c'est une figure plane, décrite par une ligne droicte finie, laquelle ayant un des poincts extremes fixe, est meuë à l'entour d'iceluy jusques à ce qu'elle retourne au mesme lieu où elle a commencé à mouvoir : comme si la ligne droicte AF ayant le poinct F fixe, est entendue se mouvoir à l'entour d'iceluy poinct F, tirant de A vers C, E, jusques à ce qu'elle revienne au mesme lieu FA, où elle a commencé son mouvement ; elle descrira par iceluy mouvement le cercle ou espace ACE, duquel la circonference est descrite et trassée par le poinct mobile A ; et le poinct fixe F, est le centre d'iceluy cercle, duquel centre toutes les lignes droictes menées à la susdite circonference ACE, sont égales entr'elles, puis qu'elle proviennent toutes d'une seule et mesme mesure, c'est à sçavoir de la ligne FA.