Figure de trois costez, est celle qui est comprise de trois lignes droictes.

Euclide voulant descrire divers genres de figures rectilignes, commence par les figures trilateres, ou de trois costez, et dit que ce sont celles qui sont contenues et environnees de trois lignes droictes : et d'autant que telles figures ont toujours trois angles, on les appelle communement triangles. Ainsi la figure A cy dessus, laquelle est contenue soubs trois lignes droictes qui constituent trois angles, sera nommee figure trilatere, ou plustost triangle rectiligne ; et y en a de diverses especes, qui seront declarees cy apres : mais la figure D, circuite et enclose de trois lignes courbes, sera dicte triangle curviligne.