Figures multilateres, ou de plusieurs costez, sont celles qui sont comprises de plus de quatre lignes droictes.

Le nombre des especes de figures rectilignes estant infiny, Euclide s'est contenté de definir, et particulierement de nommer les deux premieres especes cy-dessus declarees, c'est à sçavoir celles contenues soubs trois et quatre lignes droictes ; et quant aux autres especes de figures, qui sont contenues et encloses de plus de quatre lignes droictes, il les appelle de ce nom general, multilateres : mais les Geometres denommant particulierement quelqu'unes de ces figures multilateres, prenent leurs denominations du nombre de leurs angles : ainsi les figures cy devant cottees C, et F, lesquelles sont comprises et environnées de cinq lignes, qui constituent cinq angles, sont appellées Pentagones : Et celles contenues de six lignes, sont nommées Hexagones ; de sept, Heptagones ; de huict, Octagones ; de neuf, Enneagones ; de dix, Decagones ; de unze, Endecagones ; de douze, Dodecagones, etc.