Or des figures de trois costez, celle se nomme Triangle equilateral, qui a les trois costez egaux.
Triangle Isoscele, qui a deux costez egaux seulement.
Scalene, qui a les trois costez inegaux.

Il y a diverses especes de triangles rectilignes, soit qu'on les considere selon les costez, soit qu'on ait esgard à leurs angles : considerant les costez il y en a de trois especes, lesquelles Euclide expose par ces trois definitions : et dit premierement que le triangle qui a tous les trois costez egaux, comme le triangle A, s'appelle triangle equilateral : Mais les triangles qui n'ont que deux costez egaux, comme B et C, s'appellent triangles Isoscelles. Et finalement, le triangle qui a tous les trois costez inégaux, comme D, est nommé triangle scalene. Or les triangles Equilateraux sont tousjours uniformes et d'une mesme sorte : mais les Isosceles, et les Scalenes sont diversifiez en infinies manieres.