Sur une ligne droicte donnée, et à un poicnt donné en icelle, faire un angle rectiligne egal à un angle rectiligne donné.

Soit la ligne donnée AB ; et le poinct en icelle A ; sur lequel il faut faire un angle rectiligne egal à l'angle rectiligne donné C.

Ayant pris és lignes CD, CE, qui constituent l'angle donné C quelconques points D, E, soit menee la ligne DE : et sur AB soit construict par la proposition precedente le triangle AFG, ayant les trois costez egaux aux trois costez du triangle CDE, sçavoir est les deux costez AF, AG, egaux aux deux costez CD, CE, et la base FG à la base DE. Il est donc evident par la 8.proposition que l'angle A sera égal à l'angle C donné. Nous avons donc faict sur AB, et au poinct A, l'angle FAG egal à un donné DCE, ainsi qu'il estoit requis.

SCHOLIE

Combien la practique de ce probleme soit enseignee en nostre Geometrie pratique, neantmoins nous l'enseignerons encore icy. Soit une ligne donnee AB, et un poinct en icelle A, auquel il faut faire un angle rectiligne egal au donné CDE. Du centre D soit fait de tel intervalle qu'on voudra un arc FG, qui couppe les lignes de l'angle donné és poincts F, G : puis du mesme intervalle, soit descrit du centre A un arc interminé HI : En apres, soit prise la distance FG, et icelle portee sur l'arc HI, puis du poinct A par I, soit tiree la ligne droicte AI, et sera fait l'angle HAI egal à l'angle donné CDE.